EFE

O Goberno marroquí chamou hoxe a consultas a súa embaixadora en Madrid, Karima Benyaich, pouco despois de que esta fose convocada á sede do Ministerio de Exteriores en España. Fontes diplomáticas marroquís dixeron descoñecer polo momento máis detalles sobre esta chamada a consultas, que eleva a tensión entre Rabat e Madrid a niveis descoñecidos na última década. 

A ministra de Asuntos Exteriores, Arancha González Laya, convocou á embaixadora de Marrocos en España, Karima Benyaich, e nesa reunión expresou o seu "rexeitamento" e "desgusto" pola entrada masiva de migrantes a Ceuta e lembroulle a corresponsabilidade entre ambos os países no control das fronteiras.

A ministra de Exteriores expresou ademais o "desexo" do Goberno de "mirar ao futuro" e "evitar que actos como estes poidan volver repetirse", ademais de pedir o "compromiso de que se poidan seguir retornando todos aqueles cidadáns que entrasen de maneira irregular" en España, segundo explicou en declaracións aos xornalistas.

Laya expresou ademais o desexo de España de manter "relacións de boa veciñanza" e "estreitas" entre ambos os países, segundo relatou nunha comparecencia ante os xornalistas, na que non aceptou preguntas e non se referiu á presenza en España do líder da Fronte Polisario, Brahim Ghali, ingresado nun hospital de Logroño por coronavirus.