CRTVG

Buscar

Máis dun cento de deportistas españois, pendentes da clasifcación olímpica

Publicado o 12/03/2020 20:22

Xa hai 200 deportistas españois clasificados para os Xogos Olímpicos. Se todo transcorre con normalidade, quedan algo máis de 100 para completar a delegación que viaxará a Toquio. Entre eles, a maioría dos deportistas galegos.

A valdoviñesa Alicia Fernández pode ser a seguinte en conseguir o billete olímpico. A selección de balonmán disputará a vindeira semana o preolímpico en Valencia e a porta pechada. Tamén está garantida a celebración do preolímpico de boxeo a partir do sábado en Londres.

A incerteza non só afecta o período de clasifcación. Tamén á celebración dos propios Xogos. A gobernadora de Toquio dixo que é impensable cancelalos. Trump suxírelles aos xaponeses a cancelación.

"Non imaxino uns xogos olímpicos sen que se permita a entrada da xente. Se cadra, poderían pospoñerse un ano. Pode ser que o fagan se é posible. E pode ser que non o sexa".

Se non hai novidades, en piragüismo os selectivos disputaranse dentro dun mes, e en tríatlon, a clasificación rematará o 11 de maio. Gómez Noya está en praza a falta da proba de Bermuda, prevista para dentro dun mes.

O tenis suspendeu os torneos das vindeiras seis semanas. Nin Nadal, nin Muguruza ven comprometida a clasificación. Non se disputará o mundial 470 de vela, en que partían como favoritos o catalán Jordi Xammar e o vigués Nicolás Rodríguez, xa clasificados para os Xogos.

Noticias web

12/03/2020