O chamamento de Juan Guaidó a manifestarse diante dos cuarteis tivo escaso éxito. Apenas un cento de persoas saíron á rúa en Caracas para pedirlles aos militares que apoien o proceso de transición democrática.

Mentres, Nicolás Maduro amosaba o apoio do exército nun adestramento militar e instáballes a "estar listos" ante un "ataque dos Estados Unidos", na súa visita a un centro de adestramento militar, no municipio do Pao.

Alí, acompañado polo ministro de Defensa e por altos mandos militares insistiu en que "hai un imperio norteamericano que pretende gobernar toda América" e instou os militares a estar "preparados" ante un "ataque dos Estados Unidos".

"Estar listos e prestos a defender a patria coas armas na man se algún día o imperio norteamericano ousase tocar esta terra". Maduro pediulles "lealdade" e asegurou que a Forza Armada Nacional Bolivariana debe de "estar máis unida ca nunca". "Quero unha lealdade activa".

A visita de Maduro dáse nun contexto de especial tensión, despois de que Juan Guaidó chamara os venezolanos a manifestarse hoxe pacificamente diante dos cuarteis.

O chamamento tivo escasa resposta. Apenas un cento de persoas se xuntaron en Caracas...para convencer os militares de que se sumen ao proceso de transición democrática.

O grupo máis numeroso dirixiuse cara ao control militar da residencia presidencial La Casona, que hai anos que non ocupa ningún mandatario, onde foron freados por un grupo de policías que cortaban o paso.