CRTVG

Buscar

Junqueras, Puigdemont e Comín non recollerán hoxe as súas actas de eurodeputados

Publicado o 17/06/2019 14:06

Ás doce deste mediodía, os 54 eurodeputados elixidos nas eleccións do pasado 26 de maio están citados no Congreso para proceder ao acto de promesa ou xuramento da Constitución, trámite imprescindible para poder recoller as súas actas. Quen non o fará será o presidente de Esquerra Republicana, Oriol Junqueras, en prisión preventiva, nin o ex-presidente catalán Carles Puigdemont e o ex-conselleiro Toni Comín, prófugos da xustiza.

A defensa de Oriol Junqueras presentaba nas últimas horas un recurso de súplica ante o Supremo en que reclama que lle deixen acudir ao Congreso para recoller a acta de eurodeputado, que o tribunal xa denegou argumentando que o desprazamento posterior de Junqueras a Bruxelas poría nun "perigo irreversible" o proceso penal. Os seus avogados apelan á normativa europea e valoran esta prohibición como unha vulneración dos seus dereitos fundamentais. Din que vai en contra "do dereito a ser elixido e a exercer sen perturbacións as tarefas de representación política".

Tamén o avogado de Carles Puigdemont e Toni Comín anunciou que se a Xunta Electoral Central se nega a proclamar eurodeputados aos dous candidatos de JxCat, por non ir ata Madrid para xurar o seu cargo e recoller a acta, requisito que impón a Xunta, recorrerán ante o Tribunal de Xustiza da Unión Europea por vía dun procedemento de urxencia. Con todo, se Puigdemont se presentase no Congreso, sería inmediatamente detido, polo que se reforzaron os controis de acceso.

Dos 54 eurodeputados que están citados para recoller as súas actas e acudir á sesión constitutiva do Parlamento Europeo o 2 de xullo, hai 20 do PSOE, 12 do PP, 7 de Ciudadanos, 6 de Unidas Podemos, 3 de Vox, 3 da coalición Ahora Repúblicas, 2 de Junts e 1 da Coalición por unha Europa Solidaria. Ás tres ausencias confirmadas hai que engadir a do aínda ministro Josep Borrell, que estará nun Consello de Ministros da Unión.

 

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí

Noticias web

17/06/2019