CRTVG

Buscar

Juan Carlos Quer defende a prisión permanente revisable para o Chicle

Publicado o 01/03/2019 19:18

Esperanzada con que se faga xustiza, así agarda a familia de Diana Quer o inicio da vista oral contra o único acusado do crime, José Enrique Abuín, para o que aínda non hai data. O pai de Diana, Juan Carlos Quer, defendeu esta mañá nunha entrevista a esta canle o escrito da acusación particular que pide a prisión permanente revisable para Abuín polos delitos de secuestro, violación e asasinato.

Á espera de que o fiscal presente as súas conclusión provisorias, a acusación particular, exercida pola familia, pide prisión permanente revisable para José Enrique Abuín, o único acusado da morte de Diana Quer.

"Este individuo é un psicópata, unha persoa sen sentimentos, sen empatía de ningún tipo para o que miña filla foi un kleneex de usar e tirar", afirma para a TVG.

O escrito da acusación impútalle a Abuín asasinato, secuestro, violación, este último clave para poder solicitar a prisión permanente revisable.

"Esta pena, cualificada para supostos de extraordinaria gravidade e crueldade, existe nos países máis avanzados de Europa. E conforme ao Tribunal de Dereitos Humanos", engade.

Rematados todos os trámites procesuais, será a sección sexta da Audiencia Provincial, con sede en Santiago, a que fixe a data para o inicio da vista oral.

 

 

 

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí

Noticias web

01/03/2019