O ministro de Transportes, Mobilidade e Axenda Urbana, José Luis Ábalos, indicou este venres que a súa intención é que o tren de alta velocidade chegue a Galicia en 2021 e matizou que 2022 é "o prazo" que teñen para cumprilo.

Ábalos pronunciouse así esta tarde antes do acto de entrega do Premio Nacional de Arquitectura 2018 na Coruña, no que atendeu aos medios para defender que a súa previsión é que a alta velocidade chegue en 2021.

Esta semana o portavoz da Comisión Europea en España indicou nun acto tamén na Coruña que o prazo que manexan as autoridades europeas é xaneiro de 2022, o que desatou unha nova polémica entre o Goberno autonómico de Alberto Núñez Feijóo (PP) e o Goberno central polas datas do AVE.

"O noso obxectivo é seguir mantendo o 2021 e espero que se nos anime a cumprir e non se estean anticipando visións, que parece que algúns están a desexar que non cumpramos, mentres outros estamos a desexar facelo".