Polo momento, só Birtwhistle ten a honra de que repetiu triunfo. Aos 24 anos, é un deses novos talentos que chegaron ás series para quedar.

Para Carlos David, adestrador de Gómez Noya, "estase xuntando a madurez de atletas consagrados coa época dourada de atletas da idade de Mola ou Alarza, coa aparición de novos atletas".

Pero os veteranos tiran de galóns e encabezan as series. Vincent Luis, Mario Mola e Gómez Noya son, xunto a Geens, os outros triatletas que foron quen de repetir un podio polo que pasaron 15 nomes diferentes, o que deixa unha gran final apaixonante.

"É un mundial moi aberto, sen dominador claro como outros anos. Houbo moitas probas esprinte, e iso abre moito o abano, con moita xente preparada para gañar este tipo de carreiras. Xerou un mundial moi interesante. Pode pasar de todo, aínda que Vincent Luis chega con vantaxe, pero están abertas as prazas de podio, e mesmo a vitoria está aberta", pensa Javi Gómez Noya.

Lóxica cautela diante dunha gran final en que sempre hai sorpresas, pero que lle serviu ao ferrolán para acadar catro dos seus cinco títulos mundiais.