Era hai uns 20 anos un triatleta emerxente que gañaba case todo por Galicia. Dúas décadas cara a atras, Javi Gómez Noya visitaba a Galega. Apuntaba a estrela. Respondía con naturalidade: "A presión creo que tampouco me afecta moito. Gústanme as competicións importantes, motívanme máis que me presionan". Falaba de presión. Cinco mundiais. Unha prata olímpica. E agora, con 38 anos, vese no podio de Toquio. "Está claro que se ti a ti mesmo non te ves con opcións de podio non o vas conseguir", asegura o triatleta.

Repasemos algo do que conseguiu. Cales son os tres mellores momentos da súa carreira: "O podio en Londres, a medalla olímpica é un deles; gañar o mundial do 2013 como foi ao esprinte a Jonathan Brownlee e tamén en Londres foi tamén un gran momento. E gañar no 2019 o mundial de longa distancia en Pontevedra cos meus amigos e os meus veciños alí é tamén un momento que queda marcado", rememora Gómez Noya.  Un dos tótems do deporte galego que tentará acadar en Toquio o seu derradeiro éxito na distancia olímpica.