Un modelo de predición desenvolvido por un grupo de investigadores con participación galega conseguiu reducir un 40 por cento os tratamentos fitosanitarios antimildio en viñedos da denominación de orixe Rías Baixas. O proxecto que esta previsto que quede completado neste ano trata de identificar as épocas en que as vides están máis expostas ás infeccións fúxicas para poder combatelas máis eficazmente.

O capturador de partículas atrapa as esporas de tres fungos que constitúen a principal ameaza para as vides galegas: o mildio, o oídio e a botrite. Unha vez analizadas as concentracións no laboratorio, os datos engádense a unha base histórica que tamén recolle datos meteorolóxicos e do desenvolvemento das plantas para poder predicir cando se vai producir a infección e combatela.

A redución do emprego de produtos fitosanitarios supón un aforro ambiental e tamén económico para o viticultor, ao tempo que mellora a calidade do viño. O proxecto, chamado Viticast, completarase coa fin da vendima deste ano.