A Udyco de Vigo e o Greco de Pontevedra, en colaboración coas forzas de seguridade portuguesas, interviron 4.248 quilos de cocaína e detiveron 20 persoas. A droga, repartida en 177 fardos, era transportada a bordo dun pesqueiro de Venezuela que viaxaba con destino Galicia. 

A investigación comezou en xuño de 2020, cando a Policía seguía a pista dun cidadán hispano-marroquí que dirixía unha organización criminal dedicada a introducir en Europa cocaína. Así, os axentes determinaron que o pesqueiro dos narcotransportistas navegaba cara a un determinado punto xeográfico do Atlántico. 

As policías de España, Colombia, Estados Unidos, Francia e Venezuela prepararon un dispositivo conxunto polo que lograron descubrir como un barco pesqueiro dos que habitualmente traballan polo Caribe, remolcando unha embarcación de alta velocidade, estaba no punto de entrega da mercadoría ilegal. O modo de traballo da organización criminal era proporcionar seguridade á hora de realizar o intercambio, xa que o uso de lanchas rápidas deste perfil é indetectable. A operación concluíu coa detención de oito persoas de nacionalidade venezolana e 177 fardos dos que se incautaron con 4.248 quilogramos de cocaína. Mentres, en Venezuela foron arrestadas outras doce persoas.