Os incrementos de prezo na autoestrada nunca son benvidos, pero en Chapela o que agardaban en 2021 era a declaración de gratuitade do tramo ata Rande e non, precisamente, que encarecese.

A penas hai 3 quilómetros entre a entrada á AP-9 en Chapela e a peaxe de Rande. Sen saír do termo municipal de Redondela, os turismos pagan un euro, cinco céntimos máis có ano pasado, por circular por este treito.

Alén do compromiso da gratuitade do tramo, recollido no pacto de investidura do goberno central, os veciños reclaman pantallas acústicas e o soterramento dos carrís para mellorar a calidade de vida dos residentes na contorna.