México tamén vive protestas pola brutalidade policial por causa da morte dun home a mans de varios axentes logo de ser detido en Xalisco por non utilizar máscara na vía pública, como medida imposta polas autoridades para frear a propagación do coronavirus.

Logo da súa detención, foi golpeado ata a morte, supostamente polos axentes policiais que o capturaron. 

As manifestacións véñense producindo por todo o país, pero en Guadalaxara, capital de Xalisco, ocorreu un incidente o xoves pasado que quedou gravado. A manifestación terminou en disturbios coa Policía, cando un grupo tentou tomar un edificio estatal, pero foi repelido con gases lacrimóxenos. Na disputa, un dos manifestantes asperxeu con líquido inflamable un axente e logo prendeulle lume.