A ministra de Asuntos Exteriores, Arancha González Laya, asegurou que os indultos aos presos independentistas cataláns son "a expresión da vontade dunha sociedade de perdoar a quen cometeu uns actos ilícitos".

Á súa chegada a Luxemburgo, para participar nunha xuntanza dos vinte e sete, lembrou que os indultos en España están previstos na Constitución "previstos no ordenamento xurídico e previstos dentro do noso marco normativo".

A xefa da diplomacia española engadiu que se trata de "perdoar, neste caso, en prol dunha mellor convivencia de todos os españois en Cataluña e no resto do noso país". "Creo que é o marco en que se deben ver os indultos", constatou.

A ministra respondía deste xeito ás declaracións do presidente de ERC, Oriol Junqueras, en que aseguraba que os indultos son "un triunfo" para o independentismo, porque "demostran as debilidades dos aparellos do Estado" ante Europa. Segundo dixo, coa súa concesión "o Estado tenta protexerse" ante futuros veredictos da xustiza europea.

En declaracións a Catalunya Ràdio, Junqueras definiu os indultos como "unha reversión dalgunhas das medidas abusivas" das que, na súa opinión, foron obxecto os dirixentes independentistas.

"É evidente que cando estas decisións se confrontan de xeito efectivo coa xustiza europea non resistirán esta confrontación", augurou, de xeito que cos indultos "dalgún xeito o Estado tamén tenta protexerse ante isto".