CRTVG

Buscar

Galicia rexistra dúas novas mortes e dous novos gromos en residencias de maiores

Publicado o 23/09/2020 19:45

• A residencia Nosa Señora do Viso, en Lobeira, ten contaxiados 47 dos seus 58 usuarios e 14 traballadores

• O xeriátrico Ballesol de Oleiros notificou 23 usuarios contaxiados

Nas últimas horas, faleceron dúas persoas que foran diagnosticadas por coronavirus en Galicia. Con estes novos falecementos, elévase a cifra total de falecidos por mor do virus na comunidade a 723.

Segundo notificou o Sergas, eran un home de 94 anos que estaba ingresado no HULA e procedía da residencia de maiores de Outeiro de Rei e unha muller de 79 anos que estaba ingresada no CHUAC. Ambos presentaban patoloxías previas.

Ademais, este mércores rexístráronse en Galicia 4.460 casos activos por coronavirus, segundo a última actualización dos datos da Dirección Xeral de Saúde Pública da Consellería de Sanidade. Isto supón 110 máis ca onte.

Por outra banda, hai 251 novos contaxios.

O repartimento dos casos activos por áreas sanitarias é o seguinte: 

•   1.110 (-4) na Coruña

•   679 (-8) en Lugo

•   602 (+51) en Ourense

•   736 (+34) en Pontevedra

•   511 (+22) en Vigo

•   633  (+6) en Santiago

•   189 (+9) en Ferrol

Gromos en residencias

As residencias volven ser un dos focos de máis contaxios e preocupación. Hoxe Política Social notificou os positivos de 47 usuarios e 14 traballadores na residencia de maiores Nosa Señora do Viso, en Lobeira. Tamén preocupan os 23 usuarios contaxiados na Ballesol de Oleiros.

Outros centros de maiores con novos contaxios son: a residencia de discapacidade Ricardo Baró de Apronaga (Oleiros), con tres traballadores contaxiados máis; Orpea Lugo, con dous traballadores, e Las Salinas (Ourense) e Os Pinos (A Rúa), cun usuario contaxiado máis cada unha.

Hospitalizacións e UCI

No tocante a hospitalizacións, 32 persoas están en UCI, 217 en unidades de hospitalización e 4.211 en seguimento domiciliario. En total, curaron 17.308 persoas e realizáronse 440.382 probas PCR.