Falecen catro persoas nunha xornada de descenso dos casos activos en Galicia
• Descenden os casos activos en todas as áreas sanitarias, agás en Ourense (+13)
Nas últimas horas faleceron catro persoas que foran diagnosticadas con concoronavirus. Un home de 86 anos, unha muller de 86 anos e un home de 81 anos que estaban ingresados no CHUO, e mais un home de 83 anos que estaba ingresado no CHUS, segundo notifica o Sergas.
Todos eles tiñan patoloxías previas e ningún estaba relacionado con centros de maiores.
Cos catro novos pasamentos notificados hoxe, o total de vítimas dende o inicio da pandemia en Galicia ascende a 740 persoas.
Por outra banda, Galicia rexistra este martes 4.297 casos activos, segundo a última actualización dos datos da Dirección Xeral de Saúde Pública da Consellería de Sanidade. Isto supón 56 menos ca onte. Por outra banda, hai 159 novos contaxios.
ÚLTIMA HORA | Galicia contabiliza 4.297 casos activos este martes, 56 menos ca onte. Máis en https://t.co/hQnsUm49NA pic.twitter.com/4zATxBZzHo
— G24 (@G24Noticias) September 29, 2020
O repartimento dos casos activos por áreas sanitarias é o seguinte:
• A Coruña: 977 (-22)
• Lugo: 539 (-13)
• Ourense: 756 (+13)
• Pontevedra: 793 (-18)
• Vigo: 510 (-2)
• Santiago: 572 (-11)
• Ferrol: 150 (-3)
No tocante a hospitalizacións, hai 28 persoas na UCI, catro menos ca onte; 212 (+2) en unidades de hospitalización; e 4.057 (-54) en seguimento domiciliario. A cifra de curados ascende a 18.744 e realizáronse 474.033 probas PCR.