Francia desaconsellou este xoves "rotundamente" aos cidadáns deste país que viaxen a España por razóns de lecer e denunciou o intento de "estigmatizar" os franceses coa imaxe de turismo de bebedeira.

En calquera caso, admitiu que non pode prohibir estes desprazamentos e por tanto recomenda aos seus compatriotas o cumprimento das normas sanitarias establecidas polas autoridades no marco da loita contra a covid−19. "Desaconsellamos rotundamente viaxar a España desde Francia por razóns de lecer", sinala a Embaixada de Francia en España nunha mensaxe na súa conta oficial de Twitter, na que lembra que en caso de teren que realizar o desprazamento "os viaxeiros sempre deben cumprir as normas".

Nunha mensaxe, o encargado de negocios da Embaixada de Francia en España Gautier Lekers sinalou que non se pode prohibir aos franceses que acudan a España, unicamente se pode recomendar que non viaxen e que cumpran as normas cando o fagan. Pediu non "esaxerar un fenómeno que non existe". "Non quero entrar en polémicas sobre os turistas europeos que veñen a visitar España. Só quero subliñar que non hai que esaxerar un fenómeno que non existe", sinalou, á vez que rexeitou "rotundamente" que se trate de "estigmatizar" os franceses coa imaxe do turismo de bebedeira. "Hai de todas as nacionalidades e veñen a España agora", aclarou.