Ás oito da tarde, a imaxe da virxe saía do santuario das Angustias envolta en silencio na última procesión do Sábado Santo. O coronavirus obríganos a conxugar o copretérito nesta Semana Santa anómala que este ano, polo menos, asoma nalgunhas prazas de Ferrol e no interior dos templos, onde os fieis poden ver en versión estática as figuras e os pasos das procesións que frustou a pandemia.

Hai ambiente no centro da cidade e en hoteis coma este a ocupación superou algún día o oitenta por cento. Hai un ano as rúas estaban desertas, así que Ferrol prefire pensar en positivo e confiar en que o ano que vén si, a Semana Santa recuperará o pulso e volverá ser a cita de interese turístico internacional que atrae milleiros de visitantes. Agardan que 2022 sexa o ano do reencontro.