Ferrol prepárase para a Semana Santa. Os hostaleiros confórmanse con traballar ao 50 por cento.

A Semana Santa é un revulsivo social e económico para Ferrol. Antes da pandemia achegábanse á cidade naval milleiros de turistas para gozar desta festa declarada de Interese Turístico Internacional desde o 2014.

Emilio Vázquez Rey, presidente da Asociación de Empresarios da Hostalería de Ferrol e comarca: "Imos botar de menos ese movemento de xente. Era o único momento do ano en que xuntabamos 300 mil persoas e 40 millóns de euros"

A día de hoxe a ocupación rolda o 30 por cento. Os hoteleiros confían nos turistas galegos e nas reservas de última hora.

Loli Padín, recepcionista de hotel: "En anos anteriores estaríamos falando xa do 70 por cento e de aí para arriba..."

Este ano, e xa van dous, tampouco haberá desfiles procesionais. Porén os fieis si poderán ver, desde o Luns Santo ata o Domingo de Resurrección, as imaxes nos seus tronos, cos adornos florais, que terían que procesionar.

Non serán as procesións tradicionais, pero en Ferrol están ilusionados con este plan alternativo.

Lola Castro, vicepresidenta da Confraría das Dores de Ferrol: "Montamos uns altares de culto que xa se facían antano"

César Carreño, presidente da Xunta Xeral de Confrarias de Ferrol. "É algo descafeinado porque non é a nosa Semana Santa..."

Este ano confórmanse coas procesións estáticas, pero teñen a esperanza de que no 2022 poidan celebrar a súa Semana Santa con máis forza.