CRTVG

Buscar

Ferido grave o condutor dun turismo en Ourense

Publicado o 02/03/2020 12:42

Ferido grave o condutor dun turismo que chocou contra unha furgoneta en Ourense. Chovía con intensidade e o condutor do turismo perdeu o control do vehículo, invadiu o carril contrario e bateu contra a furgoneta. Tiveron que sacalo os bombeiros.

Os bombeiros de Ourense tiveron que intervir neste aparatoso accidente. Foi preciso liberar o condutor do turismo, que quedou atrapado polas pernas.

Nicanor Muñoz, sarxento dos Bombeiros de Ourense: "Gañar espazo suficiente para podelo retirar, liberar as partes aprisionadas e xa, os medios sanitarios poder facerse cargo del. Tiña consciencia e mobilidade".

O sinistro ocorreu ás 8.45 da mañá, nun momento en que chovía intensamente.

O turismo, conducido por un veciño de Vigo, circulaba en sentido Ourense pola Nacional 120, á altura do lugar de Quintela. Saíu do seu carril e invadiu o contrario, batendo de fronte contra unha furgoneta que se dirixía a unha das naves da zona. O turismo levou a peor parte.

Nicanor Muñoz, sarxento dos Bombeiros de Ourense: "Son coches de tecnoloxía vella e a célula de seguridade do vehículo foi superada, quedando as pernas atrapadas".

Os traballos de liberación da vía prolongáronse durante algo máis dunha hora con retencións puntuais do tráfico.

 

Noticias web

02/03/2020