Galicia acollerá vinte menores non acompañados que se atopaban en centros de protección de Ceuta antes da crise migratoria dos últimos días. O Goberno acordou coas comunidades repartir 200 prazas de acollida para liberar espazo na cidade autónoma e poder atender as persoas acabadas de chegar.

A distribución baséase nos seguintes criterios: o 50 % polo impacto de cada comunidade na acollida de menores migrantes non acompañados, un 25 % en función da poboación e outro 25 % pola situación económica (12,5 % segundo renda  per  cápita e 12,5 % por taxa de paro).

O presidente da Xunta confirmou este xoves, na conferencia de prensa posterior ao Consello, a recepción do grupo de menores asignado polo Executivo central que precisan "aloxamento, coidado e tutela".

"Por razóns de xustiza social e humanitarias estamos a favor de acoller eses menores, sen ningunha dúbida", asegurou Alberto Núñez Feijóo, "somos un pobo solidario que durante décadas tivemos que emigrar", engadiu.

Así e todo, manifestou a súa discrepancia coa fórmula de reparto, baseada ao seu parecer en "criterios inventados", e con "algunhas consideracións" sobre a xestión da crise. Porén, quixo deixar claro que unha cousa é discrepar e outra "rachar a unidade".  

Neste sentido, amosouse partidario de aprazar para máis adiante a análise da situación que, na súa opinión, parte dos "efectos chamada" realizados polo Goberno nos últimos anos. Tamén, o debate para "falar máis en serio" da distribución de menores non acompañados polo territorio, en base a uns criterios "que non se lle ocorren a unha ministra pola tarde", censurou.