O presidente da Xunta, Alberto Núñez Feijóo, reprochoulle á oposición que non fala da "Galicia real e verdadeira" nas súas críticas á xestión realizada polo Goberno galego e pediulles un pouco de "rigor" para non dar datos "falsos", que rebateu durante a súa réplica.

Na súa segunda intervención no debate sobre o estado da autonomía, recriminou a BNG e PSdeG vir a esta sesión para facer "política interna" dos seus partidos, en lugar de "pensar no futuro de Galicia".

Núñez Feijóo reprochou ao secretario xeral do PSdeG, Gonzalo Caballero, estar "en canto peor mellor", mentres que á líder da oposición, Ana Pontón, díxolle que é "moi infantil" a súa actitude de que se non se segue o "catecismo do BNG non es un bo galego".

Así, esixiu a Pontón que "fale claro" e diga se o seu partido "quere un procés galego e un referendo como en Cataluña" ou se ten algún "modelo propio" a nivel político e económico para a comunidade, algo que puxo en dúbida, á parte de pedir que aclare se vai renunciar a ir nas listas europeas con Bildu e ERC.

Ao seu xuízo, parece unha "broma" que Pontón afirme que "esta Galicia é unha Galicia pequena" só "porque a fixo un Goberno do PP" e advertiulle que se equivoca, xa que "os gobernos non os poñen os deputados, senón os que votan". De feito, respondeu á súa reclamación da Galicia "grande" que quere o BNG afirmando que: "a Galicia máis grande é a que vota libremente cada catro anos e pon no Goberno a quen considera oportuno".

Tamén advertiu a Pontón que debería sacar unha lección "como deputada máis veterana" no Parlamento, xa que cando chegou ao seu escano o PPdeG tiña 41 escanos e agora ten 42, un máis, polo que cre que non pode presentarse como "unha opción con éxito" para gobernar.

"Dóeme que veñan cos mantras de todos os anos, sen nin sequera actualizar", replicou aos grupos da oposición, aos que atribuíu un falseamento dos datos en case todos os ámbitos. Acusou a Pontón de contar "unha gran trola" ao dicir que a Xunta vai subir o recibo da auga coa nova lei de xestión do ciclo integral da auga, polo que considerou que se hai algún "sabrazo" é o que lle deu ela "á verdade" neste debate do estado da autonomía.

Tamén a Caballero lle atribuíu dicir datos falsos, como sobre o proceso de vacinación ou a lei de impulso demográfico ou as axudas á mocidade. "Nós non imos comprar o voto da mocidade", espetoulle Feijóo, en referencia ao bono cultural do Goberno central aos maiores de 18 anos para "subvencionar aos que van votar nas próximas eleccións", polo que instou o líder do PSdeG a ser "máis prudente" a este respecto.

E sobre o traslado da fábrica de Ence da ría de Pontevedra apuntou que é algo que convén ao PSOE porque "se pecha Ence en Pontevedra amplía en Navia", en Asturias, polo que lle parece que "todo cadra" e insistiu en que non conten con el para este "disparate" que cre que si conta coa "conivencia dos nacionalistas".

Núñez Feijóo reclamou á oposición falar "en serio" das cuestións a debate, como a lingua galega ou a reforma do Estatuto, para a que pediu a BNG e PSdeG que antes "reformen as súas posicións" e aclaren as súas posturas porque "nin sequera presentaron un texto estatutario".

Para concluír a súa réplica, que se prolongou durante máis dunha hora, fixo un chamamento final ao consenso. "Se queren sumar aínda teñen a última intervención e as proposta de resolución. Nós vimos a este debate para sumar", aseverou.