A vacina é a solución definitiva á pandemia, lembrou Feijóo hoxe nunha visita a Vigo, e pediu que mentres non se acade a inmunización necesaria hai que cumprir as normas para evitar pasos atrás na desescalada.

"Empeza a preocuparnos o incremento suave, pero incremento, dos índices de contaxios a 14 e a 7 días. Por iso lles pido a todos os vigueses que manteñamos a hostalería aberta e iso depende da nosa propia conduta. E, por suposto, tamén lles pido a todos os vigueses que acudan vacinarse", dixo Feijóo.

O presidente da Xunta pediu tamén que o Consello Interterritorial de Saúde debata sobre o certificado de vacinación que xa dá o Sergas dende a semana pasada e que ese documento sirva para facilitar as viaxes.

"Debe valorar que utilidade teñen eses certificados. Nós pensamos que ten que ser sanitaria e social. Calquera galego que acredite que está vacinado debería ter as posibilidades de mobilidade que se lles pide ás persoas cunha PCR recente", destacou o presidente da Xunta.