O presidente da Xunta, Alberto Núñez Feijóo, dixo que sae da reunión coa ministra de Traballo e Economía Social Yolanda Díaz "coa idea" de que Galicia vai aumentar "de forma bastante intensa" os fondos de emprego que xestiona, tanto os dependentes deste ministerio como os de Educación. Segundo comentou Feijóo, a ministra trasladoulle "un incremento importante, de máis do 30 %", dos fondos de emprego, que espera que "nas próximas semanas" se poida celebrar a conferencia sectorial e que os fondos "terán unha serie de condicionantes e de cumprimento obxectivos".

"Imos a un modelo de políticas activas que nos europeíza, cun desenvolvemento de accións condicionadas a obxectivos e cunha estratexia de valoración destas", sinalou Yolanda Díaz nun comunicado. "Paréceme que é a mellor forma de incentivar o que está ben feito e desincentivar o que non ten nin obxectivos nin criterios", respondeulle o presidente galego nun audio remitido aos medios. "Espero e desexo que podamos ter unha contía para que Galicia poida empezar xa a convocar os programas dos fondos de emprego de forma inmediata", agregou Feijóo ao destacar a importancia de que se faga coa "maior prontitude posible" para sortear as "dificultades de execución", xa avanzado o mes de marzo.

Canto aos fondos dos programas europeos, a ministra informou a Feijóo "dunha reformulación" duns "700 millóns de euros para xestionaren as comunidades autónomas". "Cumpriremos para poder xestionalos", dixo o mandatario galego acerca dos criterios que marque a UE.

O xefe do Executivo galego demandou á ministra de Traballo "un acordo rápido" para destinar axudas directas aos sectores máis golpeados pola crise sanitaria e que a distribución desas partidas "non se perda nun número indeterminado de requisitos para poder acreditar o dereito a percibilas".

Tras lembrar os dous plans de rescate impulsados pola Xunta para o sector da hostalaría, autónomos e microempresas, Feijóo abundou na necesidade de que "se simplifiquen e se flexibilicen ao máximo os criterios para que as empresas poidan percibir esas axudas e que cheguen a tempo". "Se facemos un sistema complexo, difícil, con moitas arestas e moitos requisitos, probablemente perdamos en todo este tempo miles de postos de traballo como consecuencia de que esas axudas cheguen tarde e que, por tanto, sexan inútiles desde o punto de vista do mantemento dos postos de traballo", concluíu Feijóo.

Pola súa banda, a ministra de Traballo lembrou o "positivo efecto" que as medidas en defensa do emprego tiveron en Galicia durante a pandemia. Así, subliñou que 206.000 persoas en Galicia estiveron acollidas a un ERTE nalgún momento, referiuse aos máis de 500 millóns de euros en gasto en prestacións de ERTE entre abril de 2020 e xaneiro de 2021 e aludiu a 1.187 millóns en prestacións do SEPE.

Na reunión deste martes tamén participaron o secretario de Estado de Emprego e Economía Social Joaquín Pérez Rey e a conselleira de Emprego e Igualdade María Jesús Lorenzana.

Pola súa banda, o presidente da Xunta manterá este mércores en Madrid un encontro co ministro de Transportes, Mobilidade e Axenda Urbana José Luís Ábalos, con cuestións encima da mesa como a rebaixa de peaxes e o traspaso da AP-9 ou a data do AVE.