CRTVG

Buscar

Falece atropelado un home de 47 anos na autovía do Barbanza ao seu paso por Boiro

Publicado o 03/01/2018 21:30

Un home de 47 anos morreu atropelado en plena autovía do Barbanza.  Foi no quilómetro 24 en sentido a Padrón, á altura de Espiñeiras, no concello de Boiro. Un accidente pouco común neste tipo de vías, prohibidas ao paso de peóns.

Arredor das 7 e media da mañá foi o propio condutor o que daba o aviso aos Servizos de Emerxencias, e trasladáronse ata o lugar Urxencias Sanitarias, a Garda Civil e Bombeiros de Boiro, que xa nada puideron facer por salvar a vida do atropelado. O falecido é un home de 47 anos veciño de Ferrol, que se atopaba camiñando pola calzada, dentro da propia autovía, no momento do sinistro. 

O condutor do vehículo recibiu asistencia médica no lugar do accidente, pero non presentaba lesións. Como consecuencia do sinistro, o carril dereito da autovía AG-11 en sentido a Padrón permaneceu cortado durante un par de horas. Dende os bombeiros din que este tipo de accidentes son pouco comúns nesta vía. 

Arestora, a Garda Civil está a investigar as causas do atropelo, que depende do Xulgado de Ribeira.

 

 

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí

Noticias web

03/01/2018