España, xunto con outros Estados membros, sumouse á compra centralizada da Comisión Europea de millóns de doses dunha futura vacina contra a Covid-19 da farmacéutica británica AstraZeneca, que está a desenvolver investigadores da Universidade de Oxford.

Así o asegurou o Ministerio de Sanidade nun comunicado no que se refire ao acordo anunciado pola CE o pasado 14 de agosto para a compra de polo menos 300 millóns de doses dunha futura vacina desta compañía.

Unha compra que se efectuaría unha vez que a vacina demostrase ser segura e efectiva contra o coronavirus, pois agora a investigación de AstraZeneca atópase entre as fases 2 e 3 do nivel de desenvolvemento.

A repartición da vacina farase, segundo Sanidade, de maneira equitativa entre os países acorde á súa poboación.

Á marxe deste acordo, o comité negociador da CE segue en conversacións con diferentes compañías que están a desenvolver alternativas de vacina para poder satisfacer as necesidades de vacinación da UE e de terceiros países.

Dúas destas negociacións están xa moi avanzadas e as compañías prevén presentar en breve unha proposta oficial.

Todas estas negociacións enmárcanse dentro da estratexia europea de vacinas, á que se adheriu España en xullo e pola que se pretende establecer unha posición única europea para garantir o acceso global e equitativo á vacina para protexer ao conxunto da poboación.

Por iso, e con este obxectivo, a Alianza Europea está a apoiar á industria biotecnolóxica para acelerar os prazos ata conseguir unha vacina segura e eficaz, incrementar a súa capacidade de produción e poder así garantir dose para a poboación europea.