Esta é a situación da covid-19 en España. Son os últimos datos do Ministerio de Sanidade, os que deu o mércores pola tarde.

Hai máis de 10.400 novos positivos, o que deixa a cifra total nos 835.901 contaxiados. O número de falecidos supera os 32.500. Morreron 76 persoas máis nas últimas 24 horas a causa da covid.

Con estes datos, España é xa o terceiro país de Europa con máis mortos pola covid-19, e o primeiro en contaxios. 

Segundo datos da universidade estadounidense Johns Hopkins, o total de falecidos no noso país supera os 32.500. España adianta en mortos a Francia, que ten 20 millóns de habitantes máis. E mantense por baixo de Italia e Reino Unido. 

Por número de contaxios, España é primeiro país europeo, con preto de 836.000. Séguenlle, por esta orde, Francia, Reino Unido e Italia, todos con máis de 60 millóns de habitantes, mentres que España ten 47 millóns.