Despois de tres meses e medio, España e Portugal reabren as súas fronteiras este mércores. Farano nun acto que contará coa presencia dos xefes de Estado e presidentes de Goberno.

O acto estará presidido polo rei Felipe VI e o presidente portugués, Marcelo Rebelo de Sousa, e contará coa presenza do xefe do Goberno español, Pedro Sánchez, e do primeiro ministro luso,  António Costa. A fronteira hispano-portuguesa en Badaxoz, foi o lugar escollido para a ocasión. Haberá dous eventos seguidos, un nesta localización, e outro na localidade lusa de Elvas.

Esta reapertura chega unha vez superado o estado de alarma en España, malia que con algúns rebrotes, e cunha situación que preocupa en Portugal. A pesar de que o país luso foi un dos que mantivo máis controlado o virus, os datos certifican a súa expansión nalgunhas zonas, como o cinto metropolitano de Lisboa. En cuestión de semanas, Portugal pasou a ser o segundo país de Europa en número de  contaxios por habitante, só superado por Suecia.

O Rei participará neste acto no medio da xira autonómica que protagoniza xunto a dona Letizia para trasladar o apoio da Coroa a institucións e diversos colectivos, polos os esforzos realizados para facer fronte á crise derivada da pandemia. Pola súa banda, Pedro Sánchez chegará a Badaxoz procedente de Mauritania, onde asiste este martes a un cumio do G5-Sahel.