O debate sobre as transformacións no ámbito laboral está aberto e agudizouse coa crise do coronavirus, o confinamento e a modalidade de traballo a distancia que moitas empresas implantaron a marchas forzadas.

Ademais do teletraballo, enriba da mesa están outras posibilidades de transformación da xornada de traballo compatibles coa conciliación da vida familiar e laboral, dirixidas a incrementar a oferta de emprego e, sobre todo a gañar en produtividade, un dos cabalos de batalla do mercado laboral español.

A semana laboral de catro días é unha das alternativas, que noutros países xa se materializou de forma notable, e que en España se empeza a explorar. Pero é posible a semana laboral de catro días en España?

Juan Pedro Sánchez, director da área de Benestar do Instituto de Seguridade e Benestar Laboral teno claro: "Si que é posible, pero habería que cambiar moitas cousas". Segundo a súa opinión, "o problema principal que temos é cultural".

Ese cambio estribaría, en opinión deste experto, en "implantar unha cultura orientada aos resultados, non traballar tanto por horas senón por rendemento, por obxectivos, por produtividade". E nese sentido, España suspende. "Temos unha das xornadas laborais máis longas cunha produtividade máis baixa".

"Pódese aumentar a produtividade traballando menos horas, pero cambiando a cultura cara á consecución de obxectivos, e esquecer o 'presentismo', é dicir, quentar a cadeira sen ningún tipo de produtividade, simplemente para que se vexa que estás, ou presencialmente ou conectado".

Insiste en que "non é o mesmo estar presente que estar producindo, e sobre todo en traballos que empregan a creatividade e o intelecto". Por iso asegura que "non é o mesmo ter corpos que mentes ou almas traballando".

Empresa saudable

Juan Pedro Sánchez fala, nese sentido, da "saúde integral da empresa" para acadar unha "empresa saudable".

"Non só falamos do traballador, tamén da empresa, que teña resultados económicos, e da sociedade, de toda a cadea de valor, polo que o cambio é importante e non se pode impoñer da noite á mañá". E matiza que nese novo modelo "ten que gañar todo o mundo" polo que, ao seu entender, "débese facer por consenso cos traballadores".

Un dos alicerces desa "empresa saudable" debería ser, en opinión deste experto, sería a flexibilidade, e pon exemplos de empresas que en España xa traballan catro días á semana pero máis horas diarias.

"Hai que deixar flexibilidade para que cada empresa adapte as xornadas ás súas necesidades". 

A súa receita para chegar a conseguir este novo modelo inclúe tamén "diálogo, comunicación positiva, creatividade e autonomía", uns cambios que "se poden facer, pero levan tempo, por iso non funcionaría impoñelo da noite á mañá".