O presidente de Estados Unidos, Joe Biden, dixo este mércores no seu discurso de investidura que "a democracia prevaleceu" tras o mandato do seu predecesor, Donald Trump, e definiu a xornada como "un día de historia e de esperanza". "Celebramos o triunfo dunha causa, a causa da democracia. É fráxil, preciosa. A democracia prevaleceu", aseverou Biden no seu discurso tras xurar como o presidente número 46 na historia dos EUA. "É un día histórico e de esperanza, de renovación e resolución", agregou.

Biden referiuse aos turbulentos días que viviu o país tras o asalto violento ao Capitolio o pasado 6 de xaneiro por unha turba de seguidores do xa expresidente Trump. Neste sentido, asegurou que aínda queda moito para "curar" as feridas do país e chamou a confrontar o "extremismo político, o supremacismo branco e o terrorismo doméstico", que asegurou que derrotará.

Sobre o asalto ao Capitolio por parte de seguidores de Trump o 6 de xaneiro, prometeu que non volverá pasar "nin hoxe nin mañá" Pediu, así mesmo, seguir o "camiño da unidade" para superar as múltiples crises que enfronta o país, porque sen ela "só hai amargura e furia".

 "Os Estados Unidos foi posta a proba e sairemos máis fortes", prognosticou. "Repararemos as nosas alianzas e implicarémonos co mundo de novo, non para encarar os desafíos de onte senón os retos de hoxe e mañá", foi a súa mensaxe ás persoas que lle vían desde todo o mundo.

Cara ao final dos seus máis de 20 minutos de discurso, Biden tamén se referiu ao feito histórico da chegada á Casa Branca da primeira muller na historia do país, Harris, e recalcou: "Que non me digan que as cousas non poden cambiar".

Biden, 46 presidente dos EUA

O demócrata Joe Biden converteuse este mércores no presidente número 46 da historia dos Estados Unidos, ao xurar o cargo na cerimonia oficial de investidura ante as escalinatas do Capitolio e no medio de grandes medidas de seguridade.

Áa 11.50 hora local (16.50 GMT), Biden comezou o xuramento co que se compromete a "preservar, protexer e defender a Constitución dos Estados Unidos". "Así que Deus, axúdame", exclamou Biden ao termo do xuramento.

Biden xurou o cargo sobre a mesma Biblia que utilizou con ese fin durante toda a súa carreira política: un enorme tomo que é propiedade da súa familia desde 1893 e que mide case 13 centímetros de ancho.

O presidente electo apoiouse por última vez nesa Biblia para xurar en 2013 o seu segundo mandato como vicepresidente estadounidense, cargo que exerceu entre 2009 e 2017 con Barack Obama como presidente. Obama presenciou a poucos metros de distancia o xuramento do que foi a súa man dereita na Casa Branca. O xuramento do cargo foi tomado polo xuíz John Roberts, presidente da Corte Suprema de Estados Unidos.

Na cerimonia fronte ao Capitolio tamén xurou o seu cargo Kamala Harris, que fixo historia ao converterse na primeira muller, a primeira negra e a primeira persoa de orixe asiática en ocupar a Vicepresidencia de Estados Unidos. 

A vicepresidenta xurou coa man encima de dúas Biblias: unha delas pertenceu a unha amiga da súa familia, Regina Shelton, e a segunda foi propiedade do falecido xuíz Thurgood Marshall, que foi o primeiro afroamericano que formou parte do Tribunal Supremo e é un dos grandes referentes de Harris

Cerimonia con 1.000 convidados

A cerimonia de investidura do demócrata Joe Biden como presidente dos Estados Unidos e de Kamala Harris como vicepresidenta comezou este mércores nun acto fronte ao Capitolio en Washington DC, no medio de estritas medidas de seguridade.

Ás 11.18 da mañá Biden e a súa esposa, Jill, baixaron a escalinata oeste que sae do Capitolio e dirixíronse aos seus asentos para o comezo da investidura. Pouco antes, Harris e o seu esposo, Doug Emhoff, chegaran tamén ao lugar da cerimonia, onde os esperaban uns 1.000 invitados, moitos menos que os 200.000 que adoitaban ocupar os asentos de honra durante cerimonias previas en que non había pandemia nin desafíos tan graves de seguridade.

A cerimonia comezou cun discurso da senadora demócrata Amy Klobuchar, unha das rivais de Biden nas primarias demócratas do ano pasado, quen lembrou o asalto ao Capitolio de hai dúas semanas e pediu "non dar por sentada a democracia" estadounidense. "Este é o día no que a nosa democracia ponse en pé, sacódese o po e fai o que sempre fixo", afirmou Klobuchar.

A maioría dos invitados á cerimonia son lexisladores estadounidenses, aínda que tamén están os expresidentes Barack Obama (2009-2017), George W. Bush (2001-2009) e Bill Clinton (1993-2001), xunto ás súas respectivas esposas, Michelle Obama, Laura Bush e Hillary Clinton.

O vicepresidente saínte, Mike Pence, asiste tamén á cerimonia, ao contrario que Donald Trump, quen é o primeiro mandatario en 152 anos que non participa na investidura do seu sucesor e que xa está no seu estado de residencia, A Florida. 

Na cerimonia, que comezou coa caída dalgúns flocos de neve, cantaron tanto Lady Gaga -que interpretou o himno estadounidense- como Jennifer López, que entoou "This Land Is Your Land" ("Esta terras é a túa terra"), composta por Woody Guthrie e convertida nun himno nacional, patriótico e antifascista.

Ao terminar a súa actuación, López recitou en español o xuramento de lealdade do país: "Unha nación, baixo un Deus, indivisible, con liberdade e xustiza para todos". O broche final púxoo Amanda Gorman, unha poeta negra que aos seus 22 anos converteuse na máis nova que pronunciou un poema nunha investidura estadounidense, e que conmoveu aos asistentes ao proclamar que o país entra nunha "era de redención". "Sempre hai luz, se somos o suficientemente valentes para vela, se somos o suficientemente valentes para encarnala", dixo Gorman ao concluír o seu poema. 

Ameaza de bomba no Supremo

Unha portavoz do Tribunal Supremo dos EUA informou nun comunicado que o edificio, que se atopa en fronte do Congreso, recibira unha ameaza de bomba, polo que se procedeu a inspeccionar as instalacións e decidiuse que non facía falta desaloxalas.

A cidade está en máxima alerta desde que o pasado 6 de xaneiro centos de seguidores radicais do presidente saínte Donald Trump asaltasen o Capitolio, un suceso que conmocionou o país e que arrebatou a vida a cinco persoas, incluído un policía. 

Unha carta para Biden

Rompendo coa tradición, Trump non asistirá hoxe á cerimonia de investidura do seu sucesor e xa puxo rumbo á súa mansión privada en Palm Beach (A Florida). O mandatario saínte, con todo, si deixou no despacho oval da Casa Branca unha carta ao seu sucesor, tal e como manda a tradición, de acordo coa cadea Fox, que non detallou o contido da misiva.

Coa saída de Trump da Casa Branca, conclúen catro anos turbulentos marcados pola polémica en que pasará á historia como o primeiro presidente dos EUA ao que se lle abriron dous procesos de axuizamento político, o segundo dos cales está aínda pendente de ventilarse no Senado. 

Trump aterra en Palm Beach pouco antes da cerimonia

O presidente saínte dos EUA, Donald Trump, chegou este mércores a Palm Beach (sueste de Florida), antes da asunción presidencial de Joe Biden en Washington, a bordo do avión Air Force One procedente da base aérea Andrews, en Maryland, nos arredores de Washington. Ao longo da estrada que conduce desde West Pam Beach, onde está o aeroporto, ata Mar-a-Lago centenares de seguidores de Trump concentráronse para darlle a benvida con bandeiras, carteis e camisetas e gorras coas cores da bandeira dos EUA.