Cada vez que baixa a auga do encoro de Lindoso entre Galicia e Portugal os vellos habitantes de  Aceredo volven á súa aldea para rememorar vellos tempos e tentar ver as súas casas, a vella sala de festas, a carpintería, ou a casa de Julio, o Parranda. Este ano vése mellor que nunca.

Nas súas retinas quedará para sempre a imaxe de Buscalque, Aceredo, O Vao e Reloeira diluíndose baixo a auga mentres os últimos resistentes collían os derradeiros enseres das casas.

O oito de xaneiro fixo vinte e sete anos do asolagamento das vilas. Moitos destes veciños consideran que para eles non pagou a pena que toda a súa memoria e a súa infancia queda para sempre mergullada.