CRTVG

Buscar

Dúas mulleres tiveron que ser evacuadas de madrugada en Vigo ao prender lume na súa vivenda

Publicado o 21/08/2019 13:33

Dúas irmás tiveron que ser evacuadas esta madrugada en Vigo por inhalación de fume no incendio que se produciu na súa vivenda. Sucedeu mentres durmían. Afortunadamente unha das mulleres espertou e decatouse do que acontecía. Os operarios de limpeza nocturna no concello de Vigo deron a voz de alarma e os bombeiros procederon á súa evacuación despois de subministrarlles osíxeno por unha ventá. A causa do incendio puido estar nun curtocircuíto.  

Descalzas e en pixama. Tal e como as sorprendeu o incendio regresaban esta mañá á casa as dúas mulleres evacuadas por inhalación de fume no incendio que se orixinou na súa vivenda. Sorprendeunas mentres durmían. Afortunadamente unha delas espertou e decatouse de que algo acontecía.

Os primeiros en acudir, ao escoitar gritos, foron os operarios do servizo de limpeza do concello vigués que alertaron a Policía Local e comezaron a botar auga ao inmoble. Cando chegaron os bombeiros subministráronlle osíxeno a unha das mulleres pola ventá antes de proceder á evacuación das dúas.

O incendio apenas orixinou lapas. O peor foron as consecuencias do fume.

Hai unha investigación aberta para determinar as causas do incendio que podería estar nun curtocircuíto ou sobrecarga nun cadro eléctrico.

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí

Noticias web

21/08/2019