No concello de Oroso, moi cerca de Santiago, estase a producir unha rechamante repunta de contaxios. Dos 17 casos activos, 14 detectáronse na última semana.

Medran os contaxios en Oroso e tamén os rumores sobre a súa orixe. Pero desde o concello aclaran que se trata de dous gromos familiares relacionados, que poderían quedar controlados tan pronto remate o rastrexo de contactos.

Beatriz Rodeiro Fernández, concelleira de Sanidade de Oroso: "É probable que nos próximos días aumente o número de casos en función dese rastrexo. En todo caso son focos controlados, en principio indican que non hai unha transmisión comunitaria".

Con 17 casos nun concello de 7.500 habitantes, a incidencia sobe e no bar de Manuela hai temor de que endurezan restricións. A vacinación inxecta calma nas rúas de Sigüeiro, onde están pendentes pero non alarmados. Medidas que poderían subir de nivel se os contaxios non remiten neste concello da contorna de Santiago.