CRTVG

Buscar

Dispárase o prezo da luz un 27 % en plena vaga de frío

Publicado o 08/01/2021 15:27

E en pleno temporal de frío, a factura da luz dispárase. O aumento da demanda elevou o prezo da electricidade un 27 % nesta semana. Unha suba histórica que moitos notarán na factura de xaneiro.

A luz acada prezos nunca vistos xusto nestes días en que o frío nos pide casiña e calefacción. Prender os aparatos eléctricos é esta semana case un 30 % máis caro que no comezo do ano. Se se manteñen estes prezos, o recibo medio de xaneiro acadará os 80 euros fronte aos 60 de decembro. O aumento da demanda polo frío é o principal motivo, pero non o único.

Os clientes do mercado libre non notarán este 'susto' na factura de xaneiro. Pero, ollo, os expertos insisten en que o importante é botar contas do que nos custa a luz ao longo de todo o ano, e non só nun mes de suba puntual.

Apuntan que a suba é mais notable porque vimos do 2020 cos prezos máis baixos da década e aconsellan contratar tarifas con discriminación horaria para aforrar no servizo.

Ante esta suba da electricidade, o ministro de Consumo pídelle á Comisión Nacional dos Mercados e da Competencia que investige se houbo irregularidades no mercado eléctrico. Alberto Garzón quéixase de que unha vez máis, volva coincidir unha vaga de frío cun incremento do prezo da luz.

Noticias web

08/01/2021