CRTVG

Buscar

Prisión para o condutor que fuxiu tras un accidente en que morreu un motorista

Publicado o 11/09/2019 20:51
Prisión para o condutor que fuxiu tras un accidente en que morreu un motorista

O home, que prestou declaración esta tarde, fuxira nun primeiro momento, pero entregárase o día despois, negando a súa implicación no accidente. A policía comprobou que mentía e que, ademais, carecía de permiso de conducir. Canda el foi detida unha muller que actuou como encubridora, e a quen o xuíz deixou en liberdade con cargos.

A Policía Nacional detivo o condutor que fuxiu o pasado sábado tras verse implicado nun accidente en que faleceu un motorista de 37 anos de nacionalidade portuguesa. Ademais do presunto responsable do sinistro mortal, os axentes tamén arrestaron unha muller de 67 anos natural de Ourense acusada dun delito de encubrimento, segundo informou a Policía Nacional. 

Catro días despois do accidente que custou a vida a un home que viaxaba en motocicleta, os policías procederon á detención do suposto condutor do vehículo, ao que se lle imputan os delitos de homicidio, contra a seguridade viaria, abandono do lugar do accidente e quebrantamento de condena.  

Os feitos producíronse na mañá do pasado sábado 7 de setembro. Segundo explican fontes policiais, no accidente víronse implicados dous vehículos que circulaban pola estrada N-525. O sinistro produciuse cando os coches aceleraron e un deles levou por diante un motorista. Testemuñas presenciais afirmaron ante os axentes da Policía Xudicial que investigaban o caso que o condutor do vehículo atropelou a vítima cando circulaba a gran velocidade e que na súa fuxida da zona pasou por enriba do piloto da moto. Os axentes lograron identificar o presunto condutor do vehículo implicado, a quen sitúan nun local na mañá do sábado xunto a outras dúas persoas.

Segundo a versión dos investigadores, o suposto responsable do accidente fuxiu no seu coche a gran velocidade da zona e, minutos despois, abandonou o vehículo para continuar a pé. O domingo, o detido presentouse na comisaría da Policía Local de Ourense acompañado do seu avogado. Alí sostivo que non era o condutor do coche implicado no accidente, versión que non coincide coa investigación dos axentes, que proceden a súa detención. Ademais, os policías descobren que o detido ten retirado o permiso de conducir, motivo polo que xa fora arrestado en varias ocasións. Un día máis tarde, o pasado luns 9 de setembro, unha muller acudiu ás dependencias policiais para declarar que o presunto autor do accidente mortal estivera con ela no momento dos feitos. Unha vez comprobado que a versión ofrecida era falsa, os axentes procederon á detención da muller na mañá deste mércores por un suposto delito de encubrimento. 

O detido, de 38 anos de idade e ao que constan 27 detencións previas, e a muller arrestada, tamén con antecedentes, pasaron a disposición xudicial na tarde deste mércores. 

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí