CRTVG

Buscar

Deteñen un veciño de Pol de 54 anos por agredir outro home cun vaso en Lugo

Publicado o 29/07/2020 14:24

Foi nesta céntrica praza de Lugo, nas proximidades da casa do concello, onde unha discusión entre descoñecidos acabou nunha agresión ás portas dun bar.

Ao parecer, os implicados compartiron a terraza durante un tempo sen incidencias, pero á hora de marchar o presunto agresor increpou a outra persoa recriminándolle que levaba un can sen o bozo.

Iniciouse entón unha discusión e o agresor atacou cun vaso o home que paseaba o can, causándolle un corte profundo nun brazo.

"Iniciouse unha pelexa por un can que paseaba a vítima e a outra persoa que o increpou e iniciou a discusión, rompeu un vaso e agrediuno nun brazo, causándolle feridas moi graves, polas cales tivo que ser trasladado ao hospital", sinala Manuel Arias, voceiro da Policía Nacional en Lugo.

As testemuñas da agresión alertaron rapidamente a policía e o 061. Os axentes procederon á detención do agresor, un veciño de Pol de 54 anos, mentres que a vítima foi trasladada ata o hospital de Lugo.

"En vista dos feitos, inmediatamente se detivo o agresor, que ao longo desta mañá pasará a disposición xudicial. É un delito de lesións graves porque necesita unha cura e unha atención posterior para esas lesións, non como se foran unhas lesións leves", sinala Manuel Arias.

O home detido, que tamén sufriu cortes na súa man dereita durante o ataque co vaso, terá que responder agora por un delito de lesións.

Noticias web

29/07/2020