CRTVG

Buscar

Detectados 16 novos gromos na provincia de Ourense, dez deles na cidade

Publicado o 28/09/2020 20:49

As autoridades sanitarias detectaron un total de 16 novos gromos da covid-19 que afectan diferentes municipios da provincia de Ourense. Deles, 10 localizáronse na propia cidade e o resto no Barco, Xinzo de Limia, Barbadás e Cartelle. No caso do concello das Burgas, deuse un con nove casos de tipo familiar e social, con catro mulleres afectadas de 36, 37, 18 e 64 anos; dous homes de 33 e 16 e dous menores, ademais doutro social con cinco homes de 53, 73, 49 e 67 anos e dúas mulleres de 59 e 62.

O máis grande, tamén familiar e social, rexistrou 10 positivos en menores, outro nun home de 46 anos e dúas mulleres de 57 e 47 anos. O municipio contou con outros sete gromos familiares, con 12 afectados.

En Xinzo de Limia detectouse un gromo social con dous homes positivos de 51 e 45 anos e unha muller de 28; e no Barco, tres novos brotes familiares con catro casos (home de 51 e tres menores; dúas mulleres e un menor e dúas mulleres e home).

En Barbadás rexistrouse un gromo familiar con catro homes de 48, 87, 47 e 47 anos e unha muller de 75 anos positivos; e en Cartelle outro familiar con tres casos, dous homes de 32 e 23 anos e un menor.

As autoridades sanitarias tamén actualizaron a situación doutros casos na mesma provincia. En concreto, un gromo social e familiar con nove casos en Ourense ascende a 10 tras o positivo dun home de 51 anos; en Verín, agrúpanse dous dos gromos e pasan a 16 tras cinco positivos máis; e no Barco detectáronse nove en dous gromos sociais, que pasan a ter sete e nove casos.

Noticias web

28/09/2020