CRTVG

Buscar

Feijóo defende a xestión da Xunta fronte ás críticas da oposición, que fala de parálise

Publicado o 25/09/2019 22:15

• Feijóo: "Os galegos poden contar comigo" 

• Anuncia medidas sociais e ponlle deberes ao Goberno central

 

O portavoz parlamentario do Partido Popular de Galicia (PPdeG), Pedro Puy, acusou ao resto de grupos na Cámara de ser "desleais" a Galicia por exercer a oposición "criticando á Xunta faga o que faga, sexa o que sexa" sen importar "o fondo da medida". Puy, como portavoz do grupo maioritario, foi o encargado de pechar a primeira rolda de intervención dos grupos parlamentarios na xornada inaugural do Debate sobre o Estado da Autonomía que acolle o Pazo do Hórreo desde este mércores. O popular lamentou a falta de " constructividad" que percibe nos grupos da oposición por pintar "unha Galicia negra" que, segundo Puy, "non se corresponde" coa realidade.

Caballero postúlase como alternativa dun Feijóo "illado e fatigado"

O secretario xeral do PSdeG, Gonzalo Caballero, quixo postularse este mércores como unha alternativa "sensata" ao actual Goberno dun presidente Alberto Núñez Feijóo ao que viu con "fatiga" e "cansado", ademais de sinalalo como o mandatario máis "illado" da historia da autonomía galego. Este foi o eixo do seu discurso na réplica do debate do estado da autonomía no que insistiu en que é o momento para un "cambio de ciclo" político en Galicia tras a "década negra" que o PP representou á fronte do Executivo galego. Para o líder socialista, a exposición realizada esta mañá por Núñez Feijóo "só certifica que o seu proxecto está esgotado", sen iniciativa algunha para acometer os retos vindeiros, e que tan só é capaz de presentar "parches de menor calado" para atallar as primeiras vías de auga. Así mesmo, reprochoulle a súa insistencia en cargar contra o Goberno central a pesar de que este demostrou en algo máis dun ano de mandato que "aos galegos vai ben cun goberno socialista en España", como ao seu xuízo proban os últimos resultados electorais en Galicia.

 

Grupo Común da Esqueda asegura que Galicia está cansada das falsas promesas do PPdeG

O portavoz do Grupo Común da Esquerda, Antón Sánchez, sostivo este mércores que fóra do Parlamento galego "hai unha Galicia cansada" das "falsas promesas" do PPdeG e que acredita que chegou "o inicio do fin" da era de Núñez Feijóo á fronte da Xunta. Na súa primeira intervención como líder do grupo parlamentario, Sánchez cargou contra as promesas dun presidente galego que non se preocupa polo territorio que goberna en tanto que "cada vez que ten ocasión converte o que é un debate sobre a nosa nación nun exercicio de cinismo, prepotencia e propaganda". "Unha vez máis volveu repetir a mesma posta en escena do últimos dez anos" coa que "esconde sen rubor as súas responsabilidades", nesta ocasión, percorrendo ao vitimismo fronte ao novo inimigo que supón o Goberno central agora que non está gobernado polo PP. Todo iso, porque "o seu discurso non é máis que outra cortina de fume para non render contas" dunha xestión que esconde "dez anos de recortes e desigualdades, de austeridade e falta de iniciativa política".

Pontón: "Galicia ten futuro porque o Goberno de Feijóo non o ten"

 

A portavoz nacional do BNG, Ana Pontón, asegurou este mércores que "Galicia ten futuro porque o Goberno de Alberto Núñez Feijóo non o ten" e acusou ao PPdeG de deixar unha comunidade "afogada por cinco crises": a demográfica, a económica, a do benestar e a igualdade, a ambiental e a de autogoberno. "Hoxe vimos un Goberno esgotado e intranscendente, que no centro da súa axenda só ten a supervivencia do PP e do seu líder", sentenciou Pontón na súa intervención no debate do estado da autonomía, no que insistiu en que Galicia "merece máis" e "ten que mirar ao futuro, non ao pasado que representa o señor Feijóo". A líder do BNG tamén preguntou ao presidente "cal é o valor da súa palabra tras dez anos de Goberno cun reguero de promesas incumpridas", tras o que concluíu que "a súa palabra non vale nada", xa que "vive nunha realidade paralela, a dunha Galicia convertida nunha Arcadia feliz

Villares ve a Galicia de Feijóo nunha situación de emerxencia

O portavoz do grupo mixto e líder de En Marea, Luís Villares, advertiu este mércores sobre a verdadeira situación de Galicia debido a que a "sensación de tranquilidade" que se tenta transmitir desde a Xunta non é real, porque "o certo é que vivimos nunha situación de emerxencia". "O país está en lapas" cunha situación de emerxencia "social, climática e económica" que supón unha "tormenta perfecta que cristaliza nun triste síntoma, a implosión demográfica de Galicia", relatou. O portavoz de En Marea volveu a acusar a Núñez Feijóo de tentar " desgaleguizar o debate da nación" botando a culpa da situación a outras administracións "coma se non tivese responsabilidade do que pasa no noso país".
Política Galicia
Parlamento de Galicia Luís Villares #DEAGalicia19
As exportacións do viño galego medran un 7,5%

Noticias web

25/09/2019