A ministra de Sanidade anuncia un xiro na campaña de vacinación durante o mes de abril. Tras a escaseza e os atrasos rexistrados no primeiro trimestre, Carolina Darias asegura que a partir desta semana haberá o triplo de doses dispoñibles. Pfizer comprometeuse a enviar cinco millóns, ás que haberá que sumar as de Moderna e AstraZeneca. Tamén se esperan para a segunda metade do mes 300.000 doses de Janssen. En maio, desta mesma vacina chegarán máis dun millón, e en xuño, outros catro millóns de doses.

"Nun trimestre, só coa vacina de Janssen poderemos inmunizar 5,5 millóns de persoas, porque, lembren que é unha soa dose, sen contar coas que cheguen de Pfizer, que está sendo tremendamente regular", indica Carolina Darias, ministra de Sanidade. 

"Vaise producir un incremento moi importante de vacinas, vaise multiplicar por tres respecto ao primeiro trimestre, por exemplo mañá, que por primeira vez se vai enviar nun só día un millón de doses ás comunidades autónomas", engade.

A titular de Sanidade pídelles ás comunidades autónomas que teñan os seus operativos preparados para aumentar o ritmo de vacinación.

"Fantástico o traballo que están facendo todas a comunidades autónomas, quero destacalo, esta Semana Santa van vacinar todos os días", afirma a ministra de Sanidade.

O Goberno prevé finalizar en dúas semanas a inmunización de todos os maiores de 80 anos e segue confiando en que no verán xa estea vacinado o 70 por cento da poboación española, uns 33 millóns de adultos. Pero, mentres, a titular de Sanidade pide prudencia, porque os contaxios están aumentando e poderiamos chegar a unha cuarta vaga.

O PP vai pedir a comparecencia de Darias no Congreso para que explique o estado dos contratos de compra de material médico realizados polo Goberno hai un ano ao comezo da pandemia.