O Consello de Ministros vai aprobar este martes o anteproxecto de Lei de Creación e Crecemento Empresarial, que busca reducir as trabas á creación de empresas, permitindo por exemplo a súa constitución con tan só un euro de capital, e tamén impulsar o seu crecemento e atallar a morosidade.

O Executivo persegue a creación dun marco que facilite a constitución de empresas reducindo os atrancos tanto de regulamento como financeiros a que se enfrontan os cidadáns.

A lei eliminará o requisito de contar cun capital mínimo de 3.000 euros para crear unha empresa e permitirá a súa posta en marcha con tan só un euro e de maneira rápida e telemática nun prazo próximo aos dez días.

O novo proxecto do Goberno tamén impulsará a utilización da factura electrónica entre empresas e autónomos para loitar contra a morosidade. E proporá incentivos para cumprir cos prazos de pagamento efectivos entre empresas.

O Goberno pretende incluír o cumprimento destes prazos como requisito ineludible para acceder ás subvencións estatais. A factura electrónica, pola súa parte, considérase como unha ferramenta que outorga maior transparencia e protección ás empresas.

O anteproxecto recolle tamén a ampliación do catálogo de actividades económicas que a día de hoxe están exentas de licenza para a posta en marcha de empresas.

Respecto ao financiamento, vanse flexibilizar mecanismos como o crowfunding e levaranse a cabo outras medidas para potenciar instrumentos de financiamento do crecemento alternativos ao financiamento bancario.