Correos ten previsto estender a toda España o proxecto piloto que agora desenvolve en Lugo e Xaén para que os carteiros e as carteiras rurais poidan ofrecer a domicilio moitos dos servizos que se prestan nas oficinas, grazas a dispositivos electrónicos portátiles.

A compañía sostén, nun comunicado, que esta decisión de amplialo por todo o país responde á boa acollida que tivo o proxecto en ambas as dúas provincias.

A previsión é que antes de que finalice o ano, as 6.400 persoas que traballan na repartición rural poidan ofrecer a domicilio moitos dos servizos que, ata o de agora, só se prestaban nas oficinas ou na tenda en liña de Correos.

Ademais, sinala que vai continuar avaliando a extensión progresiva desta iniciativa e estudará incorporar novos servizos de proximidade para a cidadanía.

Servizos a domicilio

Polo momento, a clientela pode mercar a través do carteiro ou carteira na súa propia vivenda, produtos postais básicos, embalaxes para os paquetes e envialos; realizar o pago de recibos de servizos como a luz, o gas ou o teléfono; adquirir os distintivos ambientais da DXT que correspondan aos seus vehículos e ingresar cartos na súa conta bancaria.