En Vigo están postas as alertas por un gromo moi activo. O Sergas xa confirmou que hai 21 casos de coronavirus nun foco que rastrexaron, en relación a clientes dun local de Samil, en que interveu a policía o pasado sábado 27 de marzo. As autoridades sanitarias piden a colaboración da cidadanía para detectar estes contactos.

Os primeiros rastrexos xa permitiron confirmar que hai 21 casos positivos. Catorce deles tiveron a súa orixe no local e o resto son contaxios que se produciron noutras festas e reunións posteriores.

Saude Pública habilitou teléfonos para que as case 200 persoas que pasaron por estas instalación ou as que tiveran contacto con elas o trasladen canto antes ás autoridades sanitarias.

O día da suposta festa ilegal, a Policía Local propuxo para sanción este establecemento por ter musica en vivo sen autorización e por non cumprir coas ocupacións permitidas. O seu xerente négao. Di que cumpría con toda a normativa covid e vai presentar recurso.