Volven os clientes ao interior de bares e restaurantes con menos da metade da ocupación, pero, ademais, cun cambio en moitos dos nosos hábitos.

Por exemplo, non poderemos consumir nada nas barras. Terá que ser nas mesas, gardando a distancia de seguridade e cunha capacidade do 40% no interior dos locais, e do 50% nas terrazas. 

Desaparecen elementos comúns que adoitaban compartirse como os panos de mesa ou os palillos e tamén as bandexas con petiscos.

Pablo Cabana, propietario dun restaurante compostelán, di que xa teñen carteis e que quitaron das mesas "todos os elementos auxiliares, panos, recipientes, menús...". Engade que tentan "darlle confianza á xente para que retome o seu día a día".

"Funcionou moi ben o tema da comida para levar", apunta o propietario. "Vimos unha forte demanda e entendemos que vai seguir así, porque durantes estes días tivemos moitísimos pedidos", engade.

"Xente que estaba acostumada a vir ler o periódico cun café... Pois agora, o café pode telo, pero, de momento, para o periódico temos que esperar un pouquiño", di Pablo Cabana, referíndose aos cambios nos hábitos dalgúns clientes.

Pero malia esa cautela, hai quen prefire camiñar lentamente cara á nova normalidade, e opta por quedar na terraza.

Din os hostaleiros que será un verán complicado, que esperan salvar, en parte, grazas á clientela local.