Avanzan as obras da estación intermodal en Ourense. Hoxe comezaron cos traballos de construción do aparcadoiro soterrado.

No barrio da Ponte dende hoxe e ata o outono do 2020 haberá que circular por rutas alternativas porque hai varias restricións no tráfico. Un ano é o que está previsto que duren as obras de construción do aparcadoiro soterrado que lle dará servizo á futura estación do AVE. Un aparcadoiro que terá máis de 300 prazas e que contará en superficie con paradas rápidas tanto de taxis como de particulares.

O paso seguinte: a construción da estación de autobuses nesta zona, nos terreos previstos. O Adif e a Xunta acaban de manter unha reunión e están dispostos a estudar a posibilidade de que os dous proxectos se poidan desenvolver simultaneamente.