Tres anos tiveron que esperar no porto de Curuxeiras, en Ferrol, para poder volver vivir o inicio da campaña da vieira. Esta era a imaxe que despois dun longo tempo parados se puido vivir esta mañá: barcos cargados de vieiras que recolleron case 3.000 quilos de produto dunha calidade extraordinaria. 

Esta primeira xornada da campaña estábase esperando como auga de maio por todos os mariscadores. Os resultados foron moi positivos e agardan que as toxinas non lles impidan seguir traballando polo menos os 15 días que teñen previsto que dure esta campaña. 

As primeiras vieiras chegaron a porto cun tamaño que había tempo que os mariñeiros non atopaban nesta zona, e esperan que iso se vexa reflectido tamén nos prezos do mercado. 

Polo de pronto, as confrarías van ir traballando semana a semana á espera dos resultados que vaian saíndo dos exames toxicolóxicos.