Facer das fachadas da vila un marco creativo onde as pintadas se convertan en arte co fin de embelecer as rúas de Cambre. É o obxectivo do Cromático Mural Fest que ata o vindeiro 1 de agosto enchen de cor e creatividade a vila.

Slim Sanfont é o primeiro de catro artistas que queren deixar a súa pegada nas paredes máis insulsas da localidade.

Casas que en Cambre se transforman en verdadeiros museos ao aire libre coas creacións destes artistas internacionais que recuperan a beleza desas zonas máis castigadas polas pintadas vandálicas.

Este ano, o festival quere implicar tamén os veciños de Cambre. Así que por primeira vez, neste engalanamento urbanístico, eles serán os encargados de elaborar un dos murais.

Nesta cuarta edición, o Cromático Mural Fest tamén quere converterse nun atractivo turístico. O vindeiro venres realizarase unha visita guiada en autobús polos distintos murais.