O ministro francés de Economía e Finanzas, Bruno Le Maire, anunciou este xoves o apoio do seu país á candidatura da súa homóloga española, Nadia Calviño, para a presidencia do Eurogrupo, poucas horas antes de que se decida quen ocupará ese cargo.

"Francia apoiará a candidatura de Nadia Calviño, a ministra española de Finanzas, á presidencia do Eurogrupo", indicou Le Maire durante unha visita a unha fábrica na localidade de Méru, no norte do país. "Demostrou todas as súas competencias durante as reunións do Eurogrupo e durante os últimos meses. Apoiámoslle porque compartimos con España a mesma vontade dunha integración máis forte da zona euro", engadiu.

Insistiu en que "Nadia Calviño pode ser unha excelente presidenta para acelerar esa integración", tras lembrar a "etapa absolutamente decisiva" que, ao seu xuízo, xa supuxo para esa vía o acordo en maio entre o presidente francés, Emmanuel Macron, e a chanceler alemá, Angela Merkel, para o fondo de reconstrución europeo, que inclúe medio billón de euros en subvencións.

Por último, o titular francés de Finanzas dixo que outro punto en favor da vicepresidenta económica española é que se convertería na primeira muller á fronte da instancia que coordina a acción dos países da moeda única europea. "É importante que chegue o momento en que unha muller dirixa o Eurogrupo", concluíu.

Xunto a ela, tamén compiten por ese mandato, que ten unha duración de dous anos e medio, os titulares de Finanzas de Irlanda, Paschal Donohoe, e de Luxemburgo, Pierre Gramegna.