CRTVG

Buscar

Caballero (PSdeG): "O resultado electoral é insatisfactorio"

Publicado o 13/07/2020 00:39

O secretario xeral do PSdeG, Gonzalo Caballero, asumiu este domingo o resultado electoral do partido nas eleccións autonómicas galegas celebradas este domingo que remataron cun "resultado electoral claro" e "lexítimo" en favor do PPdeG, que obtén a súa cuarta maioría absoluta consecutiva.

Caballero compareceu esta noite tras obter 14 deputados e non conseguir liderar a oposición en Galicia, un balance "insatisfactorio" para un PSdeG que comunicou xa por teléfono a súa felicitación ao presidente da Xunta, Alberto Núñez Feijóo, por asegurar un novo mandato. Así mesmo, destacou que estes comicios conseguiron desenvolverse con "normalidade", a pesar da "complexidade especial" de ser organizados no medio dunha pandemia e eloxiou especialmente o compromiso dos cidadáns da Mariña por seguir votando igualmente a malia ter que afrontar un rebrote do coronavirus.

"A xente votou dunha forma importante", sostivo o dirixente socialista, que valorou que o partido, a pesar de non subir en escanos respecto a 2016, aumentou lixeiramente as súas porcentaxes de apoio e quedou ás portas de obter máis representación en ata tres das catro provincias galegas. "Asumimos o resultado das urnas sempre dispostos a tentar traballar", expresou Caballero, que engadiu que o cambio en Galicia "terá que esperar polo menos catro anos máis" porque o PP está en condicións de gobernar durante este período con solvencia.

O candidato do PSdeG quixo explicar en parte o amargo resultado do seu partido sinalando que o impacto da emerxencia sanitaria freou a alta mobilización do partido nos primeiros meses do ano e declarou que tentarán "facer unha oposición responsable" e "digna" para todos os galegos. "Ese é o meu compromiso", abundou, nun sinal inequívoco, posteriormente ratificada, da súa intención de seguir á fronte do partido durante esta lexislatura para tratar de "cumprir con todos aqueles galegos que deron o seu voto a este partido".

Ao preguntarlle por posibles erros da súa campaña, demasiado centrada en aliñarse co Goberno estatal sen marcar un perfil propio, respondeu que este tipo de cuestións deberán ser verificadas nun futuro e que termina esta aventura electoral co "sentimento de cumprir dignamente, con responsabilidade, con honradez", aínda que sen a experiencia de dous candidatos máis curtidos como Alberto Núñez Feijóo ou Ana Pontón. "Non é sinxelo chegar e na primeira ocasión xa bicar o santo", concluíu.