Valentín González Formoso aínda non se pronunciou publicamente sobre a súa candidatura. Pero xa recibe eloxios. Primeiro foi o alcalde de Santiago e agora é a rexedora da Coruña.

Inés Rey considera positivo que existan "diferentes candidaturas" e de Formoso di que é un "candidato solvente". "Considero que Valentín González Formoso é un candidato solvente que ademais vén e procede do municipalismo, di Inés Rey, alcaldesa da Coruña.

O actual secretario xeral, Gonzalo Caballero, volve ofrecer integración no seu proxecto co argumento de que non é tempo de "baronías e vicerreinados". "No Partido Socialista de Galicia deciden os militantes. Non deciden nin as baronías nin as alcaldías nin os altos cadros. Non é tempo de que ningunha baronía nin ningún vicerreinado intente formular o futuro do PSdeG", afirma Gonzalo Caballero, secretario xeral do PSdeG.

Quen non quixo entrar en avaliacións foi o alcalde de Vigo. Abel Caballero hai unhas semanas pechaba filas arredor do secretario xeral ao encabezar a lista ao Congreso Federal por Pontevedra.

"Eu non estou nisto, estou na cidade, na alcaldía da cidade, na presidencia da FEMP e estou na Executiva Federal. Ese é o meu ámbito

político. O resto, obsérvoo, préstolle atención e nin sequera entro a avaliar", asegura Abel Caballero, alcalde de Vigo.

En Lugo, o presidente da Deputación, José Tomé, sen entrar a avaliar os candidatos, dixo que calquera militante ten dereito a optar a un dos cargos orgánicos.