A Comisión Europea subiu este mércores en tres décimas a súa proxección de crecemento do PIB español en 2021, ata o 6,2 %. Pola contra, rebaixouna en medio punto para 2022, ata o 6,3 %, con respecto ás súas previsións do mes de maio. Bruxelas cre que a recuperación da crise pola pandemia da covid−19 se concentrou no segundo trimestre do ano e espera que continúe segundo as previsións.

Deste xeito, España será o país que máis medre nos exercicios de 2021 e 2022 na eurozona, que verá un incremento do seu PIB do 4,8 % este ano e do 4,5 % o seguinte. "Tras a mellora da situación sanitaria, o rápido progreso da campaña de vacinación e a retirada gradual das medidas de confinamento, espérase que o PIB rebote un 2 % no segundo trimestre e un 3,1 % no terceiro trimestre" de 2021, afirma o Executivo comunitario no informe aprobado este mércores.

A Comisión Europea agarda que o consumo e o investimento aumenten con forza nos dous próximos anos. España recibirá 69.500 millóns de euros en transferencias da UE para acometer o seu plan de reformas e investimentos.