A resaca das festas privadas e os botellóns da primeira fin de semana de xullo fan que Boiro lidere a escalada de contaxios na Barbanza.

José Ramón Romero, alcalde de Boiro, di que "houbo moita xente nova na zona de ocio esa fin de semana e tiveron que intervir a Policía local e a Garda Civil en momentos puntuais, igual que sucedeu noutros concellos onde hai ocio nocturno".

"A xente con dous grolos non sabe onde vai, dígocho eu que tamén tiven 20 anos"; "Ten que ser iso, porque os maiores cumprimos con todo, aínda estando vacinados", aseguran na rúa.

Con 55 casos, Boiro rexistra a súa peor cifra desde o mes febreiro. A sombra das restricións planea aquí e nos concellos veciños da Barbanza. A primavera xa foi complicada para a hostalería na comarca e o verán comeza co pé cambiado.

"Sería un pau moi grande para os bares que xa levan un ano moi complicado";"Hostalería, comercio, todo porque se non se move a hostalería non se move o resto".

Desde o Concello piden responsabilidade, sobre todo aos mozos, onde se concentran a maioría dos contaxios.

"Fago un chamamento especial aos mozos de 12 a 30 anos, que extremen as precaucións, estamos preocupados, naturalmente", di o alcalde.

A boa nova é que non hai ingresos por covid no hospital comarcal da Barbanza. Pero cómpre non relaxarse porque a pandemia non rematou.